gaptek...

Di jaman serba canggih mode kini ko...sabana rugi kalau ndak tau jo internet. Di kota-kota gadang anak ketek sadang jaguang lah pandai jo mangarati internet, browsing sampai chatting bagai. Di sakolah dasar lah diajaan baa caro main internet tu.

untuak awak nan di daerah ko, baru diajaan di sakolah tingkek manangah ateh sajo. samantaro untuk tampek kursus atau les komputer baru ciek-ciek sajao, kadang pun ndak lo panuah siswanyo doh.

Anggapan kalau internet atau komputer tu mainan urang kota, mainan urang kayo, paralu biaya banyak masih malakek kuat di banak masyarakaik kito. sahingga hanyo saketek siswa yang nio baraja komputer. nan urang tuo pun kadang ndak pulo maijinkan anaknyo baraja komputer. sio-sio se tu nyoh. kok lah pandai beko kama ka dipakai ilemu tu, komputer ndak punyo, kok ka dibali maha sangaik, akhirnyo hilang dek ndak baulang samantaro biaya lah banyak kalua. Mantun kato rang tuo-tuo dulu.

Tapi nan sado di ateh tu kiro-kiro tigo taun nan lalu. kalau kini lah barubah. sairiang pakambangan jaman, urang tuo jo siswa lah mulai melek jo nan namonya IT nan salah satunyo adolah baraja komputer. pun kini lah banyak tampek kursus komputer nan sairing jo kurus bahasa inggris. Di sakolah pun lah banyak pulo diajaan ilmu IT ko, walau baru kulik luanyo sajo.


(sakian dulu untuk ciloteh pambuka)